Í sambandi við at tað 25. juni vóru 20 ár síðani Rættarhjálp Føroya hevði opið fyrstu ferð, var almen móttøka í Posthúskjallaranum fríggjadagin 24. juni frá kl. 15.

Har bjóðaði Nella Festirstein, forkvinna í stýrinum fyri rættarhjálpina, fyrst vælkomin.

Síðani helt Aksel V. Johannesen, løgmaður, røðu um týdningin hjá rættarhjálpini – eisini í mun til landsfyrisitingina.

Harnæst røddi Heðin Mortensen, borgarstjóri, og greiddi frá eini royndarverkætlan, ið rættarhjálpin fer undir í heyst saman við Tórshavnar Kommunu. Talan er um, at rættarhjálpin fer at hava opið á býarbókasavninum eina ferð um vikuna.

Peter Flügge, dómari, greiddi frá um sambandið millum rættarhjálpina og dómaraskrivstovuna og rættin.

At enda legði Kristina Samuelsen, dagligur leiðari á rættarhjálpini, fram hagtøl um rættarhjálpina hesi 20 seinastu árini og greiddi frá, hvar man finnur upplýsing um rættarhjálpina.

Undir móttøkuni spældi Rasmus V. Samuelsen klaver.